تابعت مؤخرا حاجه ظريفه جدا... البنات عايزين حقوق تانيه يا رجاله. كنت عارف اني لو قلت لأي حد الكلام ده حيت### من الضحك. الغريب في الموضوع اني اكتشفت ان معظمهم منضمين لنفس الحزب العبقري ده.

و سبحان الله

لو أمي قرت الكلام ده حتقول لي دع الخلق للخالق يا عتريس.

بس أنا مش قادر يا ماما.. أنا مضطر اسفا اني أقول اللى عندي.

البنات عندهم ايه يا حسرة... دول غلابه

1. مش دول برضه اللى بياخده نص فرص عمل الرجاله لو لابسين قصير ولا بيتكلموا و اللبانه في بقهم ولاّ حتى صوتهم ناعم؟

2. ولاّ يا عيني عالماتيرنيتي لييف... كلمة السرّ = سفروووت. كل ما واحده تزهق من الشغل تقوللك طب ما أنا أخلفلي عيّل يأعدني سنه حلوه في البيت. تيجي تفتح السيره تقوم رزعالك بّقّين غن عملية الولاده و الحمل. يا أخي مش كده يعني. ده أنا بيطلع عيني في الشغل من كتر الحريم اللى واخده أجازة وضع. و ببقى حاطت ايدي على قلبي أول ما واحده تقول أنا دايخه و محتاجه أروح. بيخلص الموضوع اني ببقى أنا و دكرين تانيين شايلين الشغل كله. و نص البنات في ماتيرنيتي و النص التاني لازم يروح بدري.... يروّحوا بدري ليييه؟ عشان بنات طبعا. لو شغلوا رجاله بس كانت والله مشكله البطاله دي اتحلت.

3. و يا عيني بقى في الجامعه و الدكاتره اللى تشرح الموضوع مرّه و اتنين و تلاته لو بنت هي اللى طلبت عشان غبيه. انما لو ولد اللى سأل ال دكتور يقول له "هات الكارنيه"

4. و مش البنت برضه اللى بتقعد معززه مكرمه متمكيجه في بيتها و الراجل هو اللى بيروح يتقدم و يعرق و يركّز في كلامه؟ مش الراجل هو اللى بيعد متراقب كأنه أسامه بن لادن في الصالون الشيك بتاع الضيوف اللى عمركم ما قعدتم فيه؟

5. و مش البنت برضه هي اللى بتقول "أنا شبكتي مش حتقل عن مبلغ و قدره" اللى هو كل اللى حيلت الشب الغلبان اللى نفسه يدخل دنيا؟ دنية ايه دي بقت دنيا فقر.

6. ولاّ الفرح اللى في فندق الجراند حياء... و كل ده عشان صحبتها فرحها كان في دار الدفاع الجوّي. متموّتوا بعض و تريّحونا

7. حتقوللك بس لأ.. دلوقتي كل حاجه بالنص. يعني عايزه تفهّميني يا بت انتي انك دافعه حاجه من جيبك؟ ماهو بابي هو كمان ندمان ان خلفتو جت فشنك.

و قريت حاجه ظريفه جدا... واحده دمها خفيف بتقول عايزين نشرب شيشه و سجاير و نرجع البيت وش الفجر و نعاكس ولاد و نصاحب و نهيص. و نلبس قصير. يعني احنا يعني اللى ماشيين في الشارع بالمايوه؟ طب بزمتكوا أرد أقوللها ايه دي؟ مش قاااادر أرد. طب متيجوا نفتحها عالبحري و نقول الألفاظ اللى بالي بالك لبعض بقى.

مش هي دي الحريه اللى انتم عايزنها؟ حد يشيل البت دي من قدامي.

امشوا اتلموا في بيوتكم بقى مليتو البلد.

كل اللى أقدر أقوله هو أن المحترم محترم لنفسه. ولد أو بنت.

متجوش تمسكوا الصيع و تقولوا عايزين من ده يا بابي.

بابي زهق من الصنف اللى ياخد و ينكر ده.

كفايه #@%$# بقى

و يخرب بيتك يا مصر

و اللى على راسه بطحه يحسس عليها... ولا التحسيس عيب؟