اللى على راسه ليلى
مشاكل الجنس اللطيف:
1. واحده جوزها بيضربها. – ربنا معاها بقى حقول ايه
2. واحده جوزها مش بيحترم رأيها علشان هو الراجل و هي الست - "سي لا في"
3. واحده مش طايقه جوزها علشان بيبصبص و محسسها انها لا شيء... ما انتي أكيد في حاجه غلط بتعمليها. ولاّ يمكن بقى جوزك مش مقتنع بانّه يغض بصره في الحاله دي انتي اللى في ايدك المخرج الديني.
4. واحده مش طايقه جوزها علشان مخليها هي اللى تذاكر للعيال و تطبخ و تكنس و تغسل.. طب و هو بيكون فين؟ بيعمل ايه؟ قولي له لو قاعد فاضي يساعدك... خلّيها حاجه مسلّيه. و بلاش التفكير يروح لبعيد... ورانا شغل لازم يخلص.
5. و واحده شايفه ان الناس بتبصلها نظرة الطفل للفراشه... كائن جميل بس لو يفضل ساكن... و احيانا بحس ان فعلا كل ما يفتحوا بقهم تحصل كارثه.
كل اللى أقدر أقوله كالتالي:
أولا، بالنسبه للفتاه المثمره العامله... حد خد باله قبل كده من ان نص البنات في مصر ممكن ياخده شغل أقل من الراجل لو عرفوا يهرجوا مع المدير سنّه زياده؟ أكيد خدتوا بالكم... للأسف الحريم بيجوا يطالبوا بحقوق معيّنه و بعدين يتملّصوا منها بحركه حرّه غير مباشرة تحمل معنى بريء لاكن كله وطيّ و حقاره.
ببقى قاعد في الشغل شايف البنت بتضحك مع ده و تخبط كف مع ده و أتخيل مراتي انها ممكن في شغلها تبقى واحده من دول.
راح فين زمن البنت المحترمه اللى في حالها؟
طب لو الرجّاله كلاب تهوهوو في وشهم ليه؟
تدّونا فرصه ليه؟
ولاّ في الكافيهات و البوس و الأحضان
ولاّ في مارينا وللى بيحصل تحت سطح الماء
ولاّ ولاّ ولاّ... و الكلام كتر يا عتريس... ليلى دماغها لسعت.
ازاي لو أنا راجل محترم أتجوز واحده بالمنظر ده؟
طب ألاقي فين ليلى المحترمه؟ لو في الشغل مش نافع و في النادي مش نافع؟
أقضّيها صالونات؟
مش يمكن المحترمه اللى في حالها في الصالون دي بتضرب حشيش و اتباست من طوب الأرض؟
طب الحل فين يا جماعة ليلى يا بتوع حريّة المرأه؟
بقينا في زمن "أريد حلاّ - للرجال فقط"
أظرف حاجه فعلا ان على حد علمي ان اللى بدأت الجماعه دي مصريه.... و دي حاجه مش محتاجه لا سب تيتلز و لا مترجم من السفاره... و لمّا تيجي ماما تسئلني ليه ياد يا عتريس اتجوزت سوريه ولاّ لبنانيه ولاّ صينيّه... حقوم فاتحلها بلوغ من بتوع تانت ليلى و أقول لها آدي ليلى يا ماما... لسعت و الطاسه اللى فوق اتحرقت... و نهار أبوها اسود اللى حاجي أتجوّزها و تيجي تقولّلي في شهر العجل واحنا في مارينا تحت سطح الميّه... "مش أنا كنت بكتب بلوغغغ برضه.... و كنّا عاملين حاجه اعتراضيه للثأر على المجتمع اسمها كلنا ليلى".....
حذاري يا ليلى حذاااري... نهار أبوكي مش فايت!!
الظريف برضه في الموضوع انضمام أصوات غير مصريه للموضوع... العدوه المصريه فعلا فتّاكه.
طب بقولكم ايه يا هوانم جاردن شيتي...
ايه رأيكم في قضية الشرق الأوسط؟
ايه رأيكم في اللى حصل في العراق و أفغانستلن و لبنان و فلسطين؟
ولاّ الكلام ده مقرف و محزن بالنسبه للكائنات الرقيقه أمثالكم؟
ايه رأيكم في برامج الحزب الوطني و ايه رأيكم في...
ولاّ بلاش... تلاقيكم مش عارفين حاجه غير اللى بتقولها أبله منى الشاذلي الله يمسّيها بالخير.
حاجه تحرق الدم فعلا...
حسّس ياد يا عتريس... حسّس
البطحه كبرت و بقى ليها صوت.
يا ريت ما تستغربش لو قولت لك ان الحملة دى حسستنى ان التفاهة تفوقت على نفسها
ما هو يا إما تفاها يإما كل واحدة فيهم فعلا قهرت وشافت المعاملة دى فخلاص بقت شايفه المجتمع كله زى جوزها او بباها او اخوها, ايا كان تجربتها كانت مع مين!
وأحلى حاجة فى رسالتك انك وجهت اهتمامك لقضايا اهم بكثيييير جدا من الوهم اللى هم معيشين نفسهم فيه!
Posted by
Jannah |
9/10/2006 10:17:00 PM
أنت مثال رائع على أن من لا يمر بتجربة معينة, يستحيل أن يشعر بمعاناة من مر بها. كما أنك تمثل و بشكل واضح احدى الشخصيات التى نعانى منها فأنت لا تريد حتى أن تبذل مجهودا" لتستحضر المواقف التى تكلمت عنها كل ليلى...يا أستاذ المشاكل التى نتكلم عنها ليست تافهة فلا أعتقد أنك جربت يوما" أن تمنع من النزول من المنزل حتى و لو كان ذلك للمشاركة فى عمل خيري أو لأخذ كورس مثلا".
لم تجرب الكبت يوما" , هل تعلم معنى انك سجين ذاتك؟ واضح أنك تذهب الى كل الأماكن التى تعترض فيها على سلوك الفتيات, اذا" فلماذا تذهب؟
و لعلمك تلك الفتيات ليسوا هم ليلى, فليلى لها طموح ربما لا تقدره أنت لأنه ليس التعري من أجل اعجاب الاخرين
Posted by
The_invisible |
9/11/2006 12:07:00 AM
مبدئيا أنا استحاله أجيب حل لوحده جوزها بيضربها ولا جوزها مش محترمها لأن دي كده مبقتش مشكلة مجتمع.. دي مشكلة شخصيه و البنت هي اللى لازم تشوف بيتها منهار ليه.. الطلاق مش دايما أول حل ييجي عالبال لكن هو مازال حل موجود اذا استمرّت حياتها لا تطاق. حتسأليني ليه... حقولّك علشان أولا.. الزوجه من طلقاء نفسها حتلاقي انها من غير قصد بتقول كلام مش ظريف عن جوزها قدام ولادهم.. أو مش حيبققلبها على بيتها زي بنت حاسّه بأهمّيتها و وجودها في بيتها.
لازم تتكلم مع جوزها بشكل ديبلوماسي محترم تقول له بس يا جوزي أنا مش قادرة أستحمل واحد و اتنين و تلاته و عايزاك تساعدني نصلّح الحاجات دي.
أنا لو متجوّز واحده و لقتها بتكلّمني كده أكيد حشوف أقدر أعمل ايه عشان أرضيها... يا هانم دي مش مشكلة مجتمع و مالهاش علاقه بحريّة المرأة... دي مشكلة شخصيه و لازم تتحل بشكل شخصي برضه... باقي الحريم مش حينفعوكي و حينيّلوا الدنيا أكتر... روحي بيتك الحقيه قبل الراجل اللى مش عاجبك يطير.
أما بالنسبه ليكي.. فكونك بقى مش عارفه تروحي كورسات لوحدك بيخلّيني أسأل سؤال واحد..
ليه؟
هل الولاد بيعاكسوكي و انت في المواصلات؟
طب ليه برضه؟
هل لبسك خليع؟
هل بتحطّي عطور كارولينا هيريرا و بتخلّي الأعمى يبصبصلك؟
طب سييبك
الكورس ده الساعه كام؟
يعني لمّا أهلك يخافوا عليكي هل ده ظلم ليكي؟
هل هي دي القضيه فعلا؟
هو أنا كل ده بناقشكم في القضيه دي؟؟
Posted by
Яαgιи Яαvєи |
9/11/2006 03:59:00 AM
Howa leeh e7teram elnafs we fe3l elsa7 ba2a kabt? Leeh elnas 3ayza tekhrog men itar elsa7 3ashan teb2a mabsoota we mesh makboota, we ba3deen I am sorry bas I totally agree here bebasata no one will ever do you any good with your problems, you wanna solve your problems you could and you would and only you has that in hand sawa2 felakher el7al kan extreme zai eltala2... we ba3deen lazem elwa7ed yataqabal shewayet omoor kanoo3 men e7teram elzat...
Posted by
Unknown |
9/11/2006 10:05:00 AM
حسبي الله ونعم الوكيل
Posted by
Unknown |
9/11/2006 11:13:00 AM
ولا حول و لا قوّة الاّ بالله و الله أكبر..
عاجبني كلامك على صفحتك... بس أنا حاسس أنك برضه مش فاهمه الكلام اللى مفروض انّه بين السطور...
عندكم و عندنا..
Posted by
Яαgιи Яαvєи |
9/11/2006 07:49:00 PM